Kalaallit Nunaanni Eqqartuussiviit

Eqqartuussiviut 1. januar 2010-miit tassaapput Kalaallit Nunaata Eqqartuussisuuneqarfia, Kalaallit Nunaanni Eqqartuussivik aamma eqqartuussiviit 18-it, piffinnilu qulingiluani inuttaqartuaannartuni atuullutittaaq. Eqqartuussisoqarfiup sulisorivai inuit 80-it missaat.

Januarip aallaqqaataani 2010-miit nunatsinni eqqartuussisarnermut inatsit immikkoortumigut pingaarutilitsigut allannguuteqarpoq, allannguinermi Kalaallit Nunaanni Eqqartuussivik (Retten i Grønland) pilersinneqarpoq. 2010-mi siunissamilu kisitsisitigut nassuiaasiornerit Kredsrettini, Kalaallit Nunaanni Eqqartuussivimmi taamatullu Kalaallit Nunaata Eqqartuussisuuneqarfiani naatsorsorneqartalissapput.

Tamatumunngalu atatillugu 1. januar 2010-miit eqqartuussummik naammassisitsiniaanermi suliassat Kredsrettinut isumagisassanngortinneqarput, kisitsisitigullu nassuiaasiornermi pineqartut nutaamik suliap suuneranik taaguuserlugit nalunaarneqartalissallutik.

Eqqartuussiviit

Aallaaviuvoq suliassat tamarmik eqqartuussivinni aallartinneqartarneri.

Eqqartuussivinni eqqartuussisut eqqartuussisoqarfiit eqqartuussisut ilinniartitaanerannik ilinniarsimasuupput, imaluunniit inatsisilerituutut ilinniarsimasuullutik.

Suliassaq inatsisilerinikkut ajornakusoorpat, eqqartuussisup – immaqa suliami peqataasup aappaanit kajumissaarneqarnikkut – Kalaallit Nunaanni Eqqartuussivimmut suliassaq innersuussinnaavaa, tassani eqqartuussisut tamarmik inatsisilerituujummata. Suliaq tassani eqqartuussivimmi siullertut suliarinneqaarfiusutut suliarineqassaaq, tamatumalu kingorna nunap eqqartuussisuuneqarfianut suliareqqitassanngortinneqarsinnaalluni.

Eqqartuussiviup Eqqartuussutai aalajangiineriluunniit tamarmik nunap eqqartuussisuuneqarfianut ingerlateqqitassanngortinneqarsinnaapput.

Kredsretimi nalinginnaasumik inuit akornanni saqitsaannerit kredsdommerimit aalajangiiffigineqartarput, pinerlunnermulli suliaappat, tamanna kredsdommerimit eqqartuusseqataasartunillu marlunnit aalajangiiffigineqartarpoq. Kalaallit Nunaanni Eqqartuussivik Danmarkip Eqqartuussiveqarfiata ataani inissisimavoq.

Kalaallit Nunaanni Eqqartuussivik 

Kalaallit Nunaanni Eqqartuussivik eqqartuussiviuvoq suliassaasalu pingaarnersaat tassaallutik eqqartuussivittut siullertut suliarissallugit suliassat ima ajornakusoortigisut, pinngitsoorani eqqartuussisoq inatsisilerituujusariaqarluni.

Tamatuma saniatigut Kalaallit Nunaanni Eqqartuussivimmiittut inatsisilerituut siunnersuisarput eqqartuussivinnik, inatsisilerinermut tunngasunik apeqqutissaqaraangata.

Kalaallit Nunaanni Eqqartuussiviup aallaavittut suliassarai akiliisinnaajunnaarnermut tunngasut suliassat - assersuutigalugu akiliisinnaajunnaarnerit aamma akiitsunik aaqqissuussinerit. Kalaallit Nunaanni Eqqartuussiviup suliaasa ilagivaat pisinnaatitaaffiit nalunaarsornerat.

Eqqartuussiviit saqitsaannermik suliassat aamma pinerluttulerinermik suliassat Kalaallit Nunaanni Eqqartuussivimmut innersuussinnaavaat, taakku ajornakusoortuuppata imaluunniit tunngaviusussamik aalajangiiffigineqartussaagaangaata.

Saqitsaannermi suliami peqataasup qinnutigisinnaavaa suliassaq Kalaallit Nunaanni Eqqartuussivimmi suliarineqarnissaa, suliaq pineqartumut annertuumik killiliisuuppat. Tamanna pinerluttulerinermi suliassani atuutinngilaq.

Eqqartuussivimmi suliassat suliarineqarnerisa aamma eqqartuussivinnik ilitsersuisarnerup saniatigut, Kalaallit Nunaanni Eqqartuussiviup akisussaaffigaa eqqartuussisoqarfinni ilinniartitsineq.

Kalaallit Nunaanni Eqqartuussiveqarfiup ulluinnarni aqutsisoqarnermut immikkoortortaqarfimmigut eqqartuusisoqarfiit tamaasa sullitarai.

Kalaallit Nunaata Eqqartuussisuuneqarfia

Kalaallit Nunaata Eqqartuussisuuneqarfiata kredsretip imaluunniit Kalaallit Nunaanni Eqqartuussiviup naammassillugit aalajangiiffigisai suliarisarpai, taamatullu eqqartuussisarnermik inatsit malillugu Eqqartuussisuuneqarfimmut nangeqqitsitsivittut suliaqartarluni. Taakku saniatigut ataatassaassiuinermi suliassat siullermeerutaasumik suliarisarlugit. Taamatuttaaq Eqqartuussisuuneqarfiup pinerlunnermut suliat nangeqqinneqartussatut naliliffigisassat oqaaseqarfigisarpai.

Kredsretip imaluunniit Eqqartuussiviup suliat eqqartuussinikkut aalajangiiffigisaat Eqqartuussisuuneqarfimmut nangitseqqinneqarsinnaapput. Aalajangiiffigisallu allat Eqqartuussisuuneqarfimmut suliassatut saqqummiunneqarsinnaallutittaaq. Aalajangiiffigisat allat pineqartut aalajangiinernik taaneqartarput (siusinnerusukkut eqqartuussinikkut aalajangiinerit) peqqussutilluunniit. Aalajangiinernik Eqqartuussisuuneqarfimmut suliassatut saqqummiussineq pisarpoq Eqqartuussisuuneqarfimmut aalajangiinermik suliareqqitassanngortitsinikkut.

Kalaallit Nunaata Eqqartuussisuuneqarfia Nuummi eqqartuussisarfeqarpoq, kisiannili eqqartuussivimmi suliassat aamma suliarineqartarput eqqartuussiviit eqqartuussivigisartagaanni, tamanna pisariaqaraangat.

Eqqartuussutit suliassani, Kalaallit Nunaata Eqqartuussisuuneqarfianit suliarineqartut, oqaatigineqartussaapput kingusinnerpaamik qaammatit pingasut qaangiunnerini, suliassat aalajangiiffigisassanngortinneqarneriniit.

Suliaq nunap eqqartuussisuuneqarfiani aalajangiiffigineqaraangat, taamaallaat Eqqartuussiviit qullersaannut suliareqqitassanngortinneqarsinnaapput, suliaq immikkut illuinnartuuppat. Taamaaliortoqassappat ingerlatitseqqinnissamik aalajangiisartut akuersissutaat pisariaqarpoq.

Kalaallit Nunaata eqqartuussisoqarfianik annertunerusumik kalaallisut danskisulluunnit allatanik paasisaqarusukkuit nittartagaq una takuuk: danskisut www.domstol.gl – kalaallisut www.eqqartuusivik.gl